Umsóknarfrestur veiðileyfa mun vera til 5. janúar næstkomandi. Þá ber félagsmönnum að hafa skilað inn sínum óskum um veiðileyfi á svæðum félagsins.

Veiðimaður við fossinn í Breiðdalsá / Mynd Strengir.is

Veiðin eykst bara í Breiðdalsá þrátt fyrir erfiðar aðstæður, flóð, rok og núna kulda og síðustu tveir dagar hafa gefið tæplega 50 laxa á dag! Og mikið er það nýr smálax sem er að hellast inn í bland við stórlax og er ekkert lát á göngum.

Um 1.130 laxar eru komnir á land og stutt í nýtt met frá því í fyrra sem var 1.178 svo reikna má með því að á bilinu 1.500-1.800 laxar verði lokatalan ef ekkert óvænt kemur upp á næstu þrjár vikur til mánaðamóta er veiði lýkur.

Og Freyr Frostason var að koma úr Hrútunni og hafði eftirfarandi að segja: „Sæll Þröstur. Átti til með að senda þér þessa mynd af 20 pundara sem veiddist í Réttarfossi, hann var mældur 97 sm, en sver og mikill um sig, því áætlaður um 20 pund. Viðureignin stóð hvorki meira né minna en í 1 klst og 45 mín !! Ástæða þess var að ég var með stöng fyrir línu 7 og 12 punda taum, ásamt því að hann tók litla rauða frances túbu með krók nr. 12. Fór þessi risi með mig og minn félaga sem var með háf fram og til baka í fossinum allann tíman og ætlaði ekki að gefa sig. Það var ekki fyrr en undir kvöl að ég varð að taka hressilega á honum áður en það yrði niðar myrkur, þá gaf hann sig loksins og var tekin í háf (hnútalausan). Þar var hann mældur, myndaður og að sjálfsögðu sleppt. Þess ber að geta að annar stór kom í Ármótunum en það var 17 punda hrygna sem var að sjálfsögðu sleppt.
Annars var ágætis vatn í Hrútunni og fiskur um alla á. Þó ekki mikið af honum eins og oft áður en við sáum marga stóra sveima um

Frétt Strengir.is

Guðbrandur Einarsson yfirleiðsögumaður í Ytri-Rangá / Mynd Vötn og veiði.is

Guðbrandur Einarsson yfirleiðsögumaður í Ytri-Rangá segir losun úrgangs úr kjúklingasláturhúsi Reykjagarðs í ánna verulega óviðunandi.

Fréttastofa RÚV sagði frá því í gærkvöld að úrgangur úr sláturhúsinu hefði flætt niður ánna í fyrradag, en Sigurður Árni Geirsson framleiðslustjóri Reykjagarðs sagði að um óhapp hefði verið að ræða og sér væri ekki kunnugt um að slíkt hefði gerst áður. Guðbrandur segir hins vegar að um ekkert einsdæmi hafi verið að ræða, slíkt hafi ítrekað gerst áður og opinberir eftirlitsaðilar hafi ekki sinnt kvörtunum leiðsögumanna.

Frétt: Rúv.is

Tignarlegur Tarfur að fylgjist með. / Mynd hreindýr.is

Um 763 hreindýr hafa verið veidd af veiðikvótanum, sem telur 1.001 dýr. Búast má við að mikið verði um að vera á veiðilendunum eystra á næstunni þar sem tarfaveiðitímabilinu lýkur 15. september en enn eru 58 tarfar eftir.
Þetta er heldur meira en á sama tíma í fyrra, segir Jóhann G. Gunnarsson hjá Umhverfisstofnun á Egilstöðum.
Veðrið hefur náttúrulega eitthvað spilað inn í, þoka og kuldi. Menn veiða mest um helgar og ef það veiðist mikið um þessa helgi verður þetta sjálfsagt eitthvað svipað.“Hluta veiðileyfanna hefur verið skilað inn undanfarið, og hafa þau verið boðin út til fólks á biðlista.
Það tekur tíma að bjóða mönnum þau sem eru næstir á biðlistum. Margir telja þetta mikinn happafeng og stökkva af stað þó fáir dagar séu eftir. Það er aðallega veðrið sem gæti stöðvað það að dýrin náist ekki öll,“ segir Jóhann.
Enn á eftir að veiða 180 hreindýrskýr, en veiðitími þeirra er til 20 september.

Frétt: Rúv.is

Við tarfinn er veiðimaðurinn t.v Arnór Bjarki Sigurðsson aðstoðarmaður hans Sigurður. / Mynd hreindyr.is

Þessi myndarlegi tarfur var felldur á svæði 2 í Búðatungum, þessi tarfur vóg 130 kg. Við tarfinn er veiðimaðurinn t.v Arnór Bjarki Sigurðsson aðstoðarmaður hans Sigurður. Leiðsögumaður þeirra var Rúnar Ásgeirsson.

Frétt: Hreindýr.is

Meðfylgjandi mynd er af Fanneyju Dóróthe og Arnari Óskarssyni með fallega 7 punda birtinga.

Sjóbirtingur er genginn í Geirlandsánna eftir að leifar fellibylsins Írena fóru yfir suðausturlandið með tilheyrandi vatnsveðri. Yfirborð árinnar óx mikið með tilheyrandi öskugráma. Erfitt hefur verið um vik fyrir þá veiðimenn verið hafa við ána, þennan tíma, að stunda einhverja veiði og hafa heilu dagarnir dottið út.

Menn hafa verið að velta vöngum yfir því hvenær fyrstu göngur sjóbirtings myndu ganga og er skemmst frá því að segja að hann mætti við fyrstu alvörurigningar að vanda. Þeir sem áttu dagana 2.-4. sept. gátu með herkjum einungis veitt síðasta hálfa daginn og settu í fjóra fallega birtinga sem voru tæp 10 pund, tveir 7 punda og einn 5 punda. Fiskarnir fengust í Ármótunum, Mörtungunefi og Tvístæðingshyl.

Hollið sem tók svo við af þeim fékk 14 sjóbirtinga og misstu eina vakt út sökum vatnavaxta. Fiskarnir sem voru frá 4-9 pundum fengust víðsvegar um ána en þó mest á stöðum 3-6. Voru fiskar víðsvegar um ána og eltu þeir agn veiðimanna trekk í trekk alveg upp í stöng án þess þó að taka í mörgum tilfellum. Þá sleit sig lausan risafiskur í Kleifarnefi.

Framhaldið á örugglega eftir að vera líflegt miðað við fréttirnar sem hafa borist og það sem meira er, það á að stytta upp og veður að kólna lítillega.

Almenningur að horfa á veiðimenn í Elliðaá. Mynd sportveiðivefurinn.is

Veiði lauk í Elliðaánum síðastliðin mánaðarmót. Virðist sem að aðeins sjónarmunur sé á veiðinni nú í sumar miðað við árið í fyrra. Samkvæmt bráðabirgðatölum frá veiðivörðum er tala veiddra laxa þetta sumarið tæplega 1.150 laxar.

Ekki eru öll kurl komin til grafar en til samanburðar þá veiddust í Elliðaánum 1.164 laxar í fyrrasumar.
Hafa ber í huga að árnar eru með öllu sjálfbærar, og er öll veiðin þetta sumarið fengin úr náttúrulegu klaki Elliðaánna. Hið sama var upp á teningnum í fyrra.
Aðeins er veitt á fjórar til sex dagsstangir í Elliðaánum og því ljóst að árnar skipa sér áfram á stall með allra bestu laxveiðiám landsins.

Frétt: svfr.is
Ljósm: sportveiðivefurinn.is

Nils í Hafralónsá. Þennan 104 sentímetra hæng veiddi Nils Jörgensen í Hafralónsá. Laxinn tók flugu sem hann hannaði og hnýtti sjálfur./ Mynd visir.is

Nils Jörgensen er þegar búinn að veiða fjóra ríflega 20 punda laxa í sumar Stærsta laxinn veiddi hann í Vatnsdalsá í fyrradag en hann mældist 108 sentímetrar. Galdurinn í haustveiðinni er að nota nýjar flugur

Daninn Nils Jörgensen veiddi 108 sentímetra lax í Hólakvörn í Vatnsdalsá í fyrradag.
Eftir því sem Fréttablaðið kemst næst er þetta stærsti lax sumarsins.
Fréttir bárust reyndar af því fyrr í sumar að veiðst hefði 116 sentímetra lax í Kjarrá en engin mynd hefur verið birt af þeim stórlaxi og þar með engin sönnun fyrir stærð hans.

„Laxinn tók nýja flugu sem ég hef ekki enn gefið nafn – þetta var míkrótúba” segir Nils, sem hnýtir sjálfur sínar flugur. „Ég hugsa að ég hafi verið með hann á í svona 25 mínútur. Þetta var ekki leginn og ljótur fiskur heldur silfurbjartur og fallegur hængur. Hann var samt ekki lúsugur.
Ég sleppti honum að sjálfsögðu eftir að ég hafði tekið mynd af honum.”

Stórlaxinn sem Nils fékk í Vatnsdalsánni var alls ekki fyrsti stórlax sumarsins hjáhonum.

„Þetta hefur verið frábært sumar. Ég veiddi tvo stóra í Laxá í Aðaldal fyrr í sumar. Annar þeirra var 100 sentímetrar en hinn 103. Svo veiddi ég einn 104 sentímetra lax í Hafralónsá fyrir skömmu.”

Nils segir galdurinn við haustveiðina vera að nota nýjar flugur, öðruvísi eða sjaldgæfar.

„Á þessum árstíma eru veiðimenn oft að reyna við lax sem hefur verið í á í langan tíma. Þá þýðir oft lítið að nota rauðan eða svartan frances eða aðrar vinsælar flugur því fiskurinn er margsinnis búinn að sjá þær.”

Þó laxveiðin skipi stóran sess í lífi Nils þá veiðir hann einnig aðrar tegundir.

„Á vorin veiði ég silung, ég held það sé óhætt að segja að ég elski hreinlega að veiða silung,” segir Nils en aðspurður segist hann þó ekki vilja gefa upp hvaða vötn eða ár séu í uppáhaldi.

Hann vilji halda því svolítið fyrir sig. Hvað laxveiðina snertir segir hann Vatnsdalsá og Miðfjarðará vera í sérstöku uppáhaldi en einnig sé Hafralónsáin stórbrotin veiðiá.

Nils kynntist landi og þjóð fyrst fyrir um sjö árum. Hann segist strax hafa heillast af ósnortinni náttúrunni og að sjálfsögðu öllum þeim fjölda af veiðiám sem hér séu. Árið 2008, rétt fyrir hrunið, ákvað hann síðan flytja til Íslands en fram að þeim tíma hafði hann heimsótt landið svona sjö til átta sinnum á ári til að veiða.

Nils vinnur fyrir sér sem hönnuður en hann hefur meðal annars hannað veiðifatnað, stangir og hjól fyrir danska fyrirtækið Scierra en í dag á sitt eigið hönnunarfyrirtæki og vinnur sjálfstætt.

„Það má segja að ég reyni að vera sem mest inni á veturna en úti á sumrin. Ég reyni að vinna eins og vitleysingur á veturna svo ég hafi sem mestan tíma til að veiða á sumrin,” segir Nils sem vinnur einnig sem veiðileiðsögumaður á sumrin.

Frétt: vísir.is
Ljósm: visir.is

Það eru hrikaleg tröll á sveimi á Nesveiðum sem endranær. Þau hafa þó ekki náðst á land, þó að 100-103 cm langir laxar séu að veiðast sl. daga

Eftir mikil hlýindi tók að rigna við Laxá sl. föstudag,
og rigndi lungan úr helginni. Hreinsaði það að mestu burtu slýið sem hafði verið til ama dagana á undan í hitunum.

Í rigningunum hækkaði nokkuð í ánni og hreyfði það laxinn aðeins til. Á laugardagskvöld veiddust 96,101, og 102 cm laxar auk þess sem að nokkrir sluppu frá veiðimönnum.

En það eru ekki þessir laxar sem mest er talað um þessa stundina. Svo virðist sem að meira sé af tröllum heldur en nokkurn grunaði. Í Höfðahyl eru þau nokkur, en til mjög stórra laxa hefur sést í Sandeyrarpolli, Oddahyl, Skriðuflúð, Kirkjuhólmabroti, Knútsstaðatúni og svo auðvitað í Presthyl, Hólmavaðsstíflu og á Óseyri.

Frétt: svfr.is
Ljósm: svfr